المستشار أحمد جودت الملط يكتب: نصيحه لله للرجال المقبلين على الزواج

حاول تشغل عقلك ولو لدقائق قبل إتخاذ هذا القرار .. ماتخليش رغبتك فيها تعميك وتقول عادي ما كل الزيجات بيحصل فيها كده !!
أصل ده عرف بلدنا !!
أسأل نفسك ليه بيطلبوا منك تمضي علي إيصال أمانه اسمه القائمة !!
مافيش إجابة غير انها ورقه تستخدم عند الحاجه لحبسك ..

و إلي والد العروسه ..
أنت مش بتبيع بضاعه .. دي بنتك اللي أغلي من فلوس الدنيا كلها .. مالهاش سعر أصلا علشان تقعد تقول قائمتها لازم تكون بكذا زي فلانه بنت خالتها ولا علانه بنت عمتها !!
هي لا تقدر بثمن ..
اختار الزوج الصالح زي ما قال دينك وادعي ربنا أنه يختار لك صح ويوفقك في الاختيار .. لكن الاسلوب الرخيص ده عمره ما بني بيت ولا حافظ علي بناتنا !!

ولا أمي وأبويا ولا أخويا ولا أختي ولا أنا فكرنا نعمل الكلام ده
لأنها ببساطه اهانه للطرفين غير مقبوله ..
واحد رايح يتجوز فيمضي علي إيصال أمانه والتاني بيسعر بنته ويبيعها !!!!
ده مش شرع ولا دين !!
لازم تقول لأ .. وكل عرف خطأ يجب ان يتم تصحيحه .. خليها تعنس جنبه وساعتها حيجوزها بما يرضي الله ..

في المركز اللي انا شغال فيه في الصعيد مجموعه من الساده المحامين بتكلمني وبتحاول تقنعني بأن الموضوع طبيعي علشان العادات والتقاليد .. سألت أحدهم أنت كتبت قائمة لما اتجوزت ؟
رد بتلقائيه لأ طبعا !!
قلت له ليه ؟
قالي علشان هما عارفين أنا مين ووضعي الإجتماعي !!
وطبعا أنتهي النقاش عند هذا الحد
يبقي هي مش تقاليد ولا عادات !!

ناس كتير بسيطه جدا سألتني قبل الجواز وفهمتهم والجوازه اللي كان داخل عليها باظت واتجوز واحده أحسن منها من غير إيصالات أمانه والحمد لله عايشين ومستريحين !

ف ياريت بعد ما تترفع عليك القضيه ماترجعش تزعل .. أنت اللي أخترت يوم ما وفقت علي المهزله دي .. يا تدفع التمن يا تتحبس وأنت ساكت !

#بناتنا_مش_سلعه
#جوازه_مش_قضيه

ربنا يهدي نفوسنا ويصلح أحوال بيوتنا ..

مافيش ما يمنع ان الزوجه تجيب فواتير رسميه باسمها بالحاجات اللي حتجبها في بيت الزوجه ضمانا للحقوق ..
مافيش ما يمنع ان الزوجه تكتب صداق (المهر) مقدم و مؤخر بأي مبلغ هي تطلبه ..