هل خطف إله فرعوني قديم سياح من روسيا عام ١٩٨٥؟
حكاية يحكيها: محمد أمير
القصة دي تتفق او تختلف معاها هي مش من تأليفي ومش نابعة عن ايماني الشخصي، مجرد بعرضها بس للي مسمعش عنها، لو يعني متعرفهاش اديك عرفتها.
من ضمن الحاجات الغريبة اللي متعلقة بمنطقة اهرامات الجيزة، حادثة حصلت سنة ١٩٨٥م في منطقة الاهرامات واللي لحد يومنا ده ملهاش اي تفسير،
القصة ببساطة انه سنة ١٩٨٥م تحديدا يوم ٢٣ ابريل، مجموعة من السياح الروس عددهم ١٢ سايح اختفوا، حمولة باص سياحي كامل من روسيا اخر مرة اتشافوا كانوا خارجين من هيلتون القاهرة، واختفوا فجأة كدة،
المهم اتفتح التحقيق وقتها، ومع التحقيق اكتشفوا ان ال١٢ سايح دول اساسا عاملين جماعة كدة دينية اسمها the followers وفيها بيؤمنوا بعودة اوزوريس وانهم سبق لهم الاجتماع في بيوتهم في روسيا قبل زيارتهم لمصر ومناقشة سبل عودة الالة ده للارض في توقيت معين عن طريق الاهرامات، وان التوقيت ده بيوافق يوم ٢٣ ابريل ١٩٨٥م وعشان كدة جم علي مصر.
مبدأ ايمانهم ده مبني علي حادثة اقدم حصلت هنا في مصر او يقال انها حصلت، سنة ١٩٦١م وقت الحرب الباردة بين روسيا وامريكا، روسيا اخدت منطقة الاهرامات للدراسة من جمال عبد الناصر ومعاهم بعثة مصرية بقيادة سامي شرف، وعلماء روس مع خبراء عسكريين في النشاط الإشعاعي والحرب الكيماوية، وهدف الحملة دي كان دراسة استراتيجيات المصريين القدماء وامكانية استخدامها في الحروب الحديثة،
عملية سماها جهاز المخابرات الروسيةالKGB بأسم 03 ISIS Project او مشروع ايزيس 03 وطبعا كانت عملية سرية وفضلت سرية سنين طوال لحد ما قناة Express البريطانية عملت فيلم تسجيلي عن العملية دي وكان ضيف الفيلم هو دكتور فيكتور إيفانوفيتش، المستشار العلمي السابق للكرملين،
الدكتور واللقطات اللي اتاخدت من الفيلم بتقول كلام غريب جدا، اهمها انهم بيقولوا انهم لقوا مقبرة سموها مقبرة الزائر، فيها مومياء لكائن ضخم طوله مترين وشوية شبة البشر بس مش بشري، وقالوا ان عمره ١٢ الف سنة، سموه الزائر عشان ظروفه متوافقة مع قصة قديمة عن زيارة آلهة مصرية لمصر زمان وانهم علموا مصر العلوم دي كلها ومشيوا ماعدا اوزوريس اللي فضل قاعد وكان ليه اوضة بينتقل بيها بين عالمنا وعالمه، كلام كدة تحسه تخاريف،
الا ان الفيديو اللي اتسرب سنة ١٩٩٨م والصور بيوافقوا الحادثة دي، للي مهتم دا لينك للفيديو ودي حاجة غريبة جدا يعني : https://youtu.be/dBeRHyVRfHw
فيه تفاصيل كتير عن العملية وان كانت مزيفة علي حد قول بعض العلماء المصريين، انهم حسوا بطاقة غامضة وهما جوا، وان المقبرة دي اساسا اكتشفها اتنين من البدو اللي ماتوا في ظروف غامضة، وحاجات مني دي كتير، بس دي مش قصتنا.
الفيلم خبراء كتير قالوا انه حقيقي مش متفبرك، الا ان زاهي حواس رفض الكلام ده تماما في مكالمة مع عمرو اديب وقال انه هري ومش حقيقي وان كل الناس عايزة تنتسب للاهرامات والحضارة وخلاص،. وده فيديو رد زاهي حواس : https://youtu.be/6aC_YVi5VLU
نرجع بقا للحكاية الاصلية، السياح اللي اختفوا دول مظهرلهومش حاجة الا فيلم كان في كاميرا لقوها في منطقة الاهرامات بعد اختفاؤهم، الفيلم كان ظاهر فيه السياح وهما داخلين منطقة الاهرامات، وبعدين الكاميرا اتثبتت وهما قاعدين بيصلوا علي ركبهم في وضع صلاة، وبعدين فيه نور غريب بيسطع علي عدسة الكاميرا والفيلم بيقطع، ودي اخر حاجة ظهرت عن السياح اللي لحد دلوقتي محدش عارف هما راحوا فين، الفيديو اهوه : https://youtu.be/BLq_Nxeg6Uc
السياح راحوا فين، محدش عارف، طب مشروع ايزيس اكتشف ايه؟ محدش عارف، ايه الموميا العملاقة دي وهل كيان تم تأليهه فعلا او فضائي؟ بردو محدش عارف، طب هل الفيديوهات والحادثة حقيقيين ولا مزيفين؟ محدش عارف،
الحاجة الوحيدة اللي معروفة ان الاهرامات لغز كبير وهيفضل لغز لحد اخر يوم علي كوكب الارض،
وقبل ما تعلق وتقول اي حاجة، انا مبقولش انها حقيقية ومبقولش رأيي الشخصي، انا بعرض الحادثتين بلينكاتهم بس للي مهتمين، وكونها حقيقية او مزيفة الا انها في النهاية قصة مشوقة.
اول ٣ صور هو خبر الاختفاء وصورتين من الفيديو بتاع السياح، والباقي من مشروع ايزيس، والفيديوهات تحت كل فقرة.
ISIS Project: The Extraterrestrial Mummy Found by the KGB in Egypt
